Ҳалол сеҳр

Насиҳатларимни муслима аёллар учун тақдим этаман. Бу насиҳатларга амал қилиш билан хотин эрини сеҳрлаб, мутлақо ўзига қаратиб олиши турган гап. Бу иш, албатта, Аллоҳ таоло ҳалол қилган нарсалар билан бўлади: – аёл эри учун зийнатлансин; – эрига бирон-бир хунук нарсани кўрсатмасин; – эри ундан фақат ширин ҳидларни туйсин; – ҳамиша гўзал табассумли бўлсин; – эрига ва эрининг яқинларига фақат яхши сўз айтсин; – эрининг молини, шаънини муҳофаза қилсин; – фарзандларига меҳрибон ва шафқатли бўлсин; – Аллоҳга осий бўлмайдиган барча ишларда эрига итоат этсин. Лекин, ҳозирги кунимизга назар соладиган бўлсак, мутлақо тескари ҳолатнинг гувоҳи бўламиз. Хотин киши бирор юмуш билан ёки маросим учун уйдан чиқар экан, бўяниб-безаниб, хушбўйланиб, бисотидаги нафис кийимларни кияди. Ишини битириб, уйига қайтиб келгач эса, бўёқлар ювилади, тақинчоқлар ечилади, чиройли кийимлар жойига илинади (Қанча машаққатлар билан у кийимларни, олтин тақинчоқларни сотиб олиб берган эр эса, уларни кўриб баҳра олишдан маҳрум юраверади). Ўрнига эски кийимлар кийилади, улардан овқат, пиёз ҳиди келиб туради... Ҳолбуки, аёлнинг зийнатланишига ва чиройига бошқалардан кўра эр ҳақлироқ эмасми? Синглим, қизим, келиним... Қулоғингга яхшилаб қуйиб ол: агар эринг кўчага иш билан чиқиб кетса, тезлик билан уй ишларига шўнғи. Юмушларингни битказиб бўлгач, ювиниб, зийнатлан, чиройли бўлиш чораларини кўр ва эрингга интизор тур. Токи у ишдан қайтиб келганида, қаршисида гўзал аёлини кўриб, баҳри дили очилсин, саришта уйини кўриб, қувонсин, ширин таомларни еб, нафси қонсин. Шунда унинг сенга бўлган муҳаббати янада зиёда бўлади, сенга маҳкамроқ боғланиб қолади. Аллоҳ номи ила қасам ичиб айтаманки, эрни бундай сеҳрлаш ҳалолдир. Унутмагилки, тўқ одамгина бошқа таомга иштаҳа қилмайди... Ботирхўжа Қосимхўжаев тайёрлади