Ўткинчи севги ва ҳақиқий ҳаёт

Савол: ассалому алайкум. Сизга бир саволим бор эди: менинг ёшим ўн тўққизда. Беш ярим йил олдин бир йигит билан танишиб қолганман. У билан шу вақтгача севишиб келардик. У хизматга кетганда мен унга хиёнат қилиб қўйдим. Яъни, йигитлар билан гаплашиб қўйдим. У мени кечиролмай мендан етти ойга узоқлашди. Кейин ўзим унга, мени кечиринг, дея ялиниб ёлвордим. Чунки англаб етгандимки, усиз ҳаётимнинг маъноси йўқ. Вақт ўтгач орамизда келишмовчилик бўлиб, у мени ташлаб Москвага кетди. Ҳозир бир йигит уйимизга совчи жўнатмоқда. У яхши йигит, лекин кўнглим бошқада. Нима қилай? Унга турмушга чиқиб, ўзганинг хаёли билан яшашни тасаввур қилолмаяпман. Севган инсоним энди менинг олдимга ҳеч қачон қайтиб келмайди! Маслаҳат беринг, илтимос, қандай йўл тутай?! Жавоб: ва алайкумус салом. Бунда бир нечта хатолар содир этилган ва натижада кўнгилсиз ҳодиса рўй берган. Биринчидан, ҳали ўрталарида никоҳ бўлмаган йигит ва қизнинг йиллар давомида бирга юришлари, бир- бировини “синаш”лари мумкин эмас. Шариат бу ишдан қайтарган. Зеро, бу билан турли гуноҳ ишлар содир этилади. Сизлардаги энг катта хато ҳам шу аслида. Сиз “севган” йигитингизни қўйиб бошқа болалар билан гаплашганингизни “хиёнат” деяпсиз. Аслида ўша “йигитингиз” билан ношаръий гаплашиб юришингизнинг ўзи хиёнатдир. Сабаби шариатга хилоф ҳар қандай ҳолат хиёнат, шаръий қонун- қоидага зид саналади. Шундай экан, бу борада шариат аҳкомларини билиб олиш керак. Сиз ҳозир боши берк кўчага кириб қолгансиз. Бир тарафдан, сиз яхши кўрган йигит чет элга кетиб қолган, аммо кўнглингиз ўшанда. Унинг сиздан кўнгли қолган. Иккинчи тарафдан, сизга бошқа оила вакилидан совчи келмоқда. Лекин “биринчи муҳаббатингиз”дан воз кеча олмаяпсиз. Унутмангки, ёшликдаги, моддий ҳирс ва шаҳватларгагина асосланган муҳаббат ўткинчидир. Бу ҳис-туйғулар оила қургач, секин-аста унутилади. Эр ва хотин ўртасида ҳақиқий меҳр-муҳаббат ва шафқат ҳисси доимийдир. Бу чиройнинг завол топиши, ёшнинг катталашиши билан ҳам салбий томонга ўзгармайди. Аксинча, ёшлари кексайган сари ҳақиқий муҳаббатга эга эр-хотинлар бир-бирига қаттиқроқ суяниб қоладилар. Хуллас, сизга берадиган маслаҳатимиз шуки, сиз аввало қилган гуноҳларингизга тавба қилинг. Зеро, сиз аввалда йигитлар билан гаплашиб, ношаръий ишларга қўл ургансиз. Кейин ўша “биринчи муҳаббатингиз”ни унутинг. Энди у сиз билан яшай олмайди. Сабаби эркак киши бундай “хиёнат”ни кечиролмайди. Қолаверса, совчи қўяётган йигит сизга ҳар тарафдан мос бўлса, гувоҳлар иштирокида учрашув ташкил қилиниб, маъқул келса, ўз жуфтингиз билан оила қуринг. Аввалги ҳис-туйғуларни унутишга, ўтмишда қилинган гуноҳларни такрорламасликка ҳаракат қилинг. Шунда бўлажак турмуш ўртоғингиз билан бахтли ҳаёт кечирасиз. Шуни унутмаслик лозим, турмуш баъзи ёшлар ўйлаганидек, енгил ҳаёт, шоҳона зиёфат, хаёлий муҳаббату чет элма-чет эл саёҳат қилишдангина иборат эмас. Турмушга ҳаққоний назар билан қараган одамгина бу ҳаётда бахтли бўла олади. Сароб орзулар ва ушалмас тилакларга қул бўлганлар бир умр ҳаётдан нолиб ўтадилар. Аллоҳ таоло йўлингизни чароғон ва нурли қилсинг, Ўзининг амрига итоат этиб, солиҳа мўминалардан бўлишингизни насиб этсин!