«Қайнонамнинг ардоқли келинман-у, ёримга бегонадекман...»

— Қайнонам аввалбошдан ўқиган қизни келин қиламан, деб оғиз кўпиртириб юраркан. Ҳатто, ўқимаган дея ўғли кўрсатган номзодларнинг барини инкор этган пайтлари ҳам бўлган экан. Шунинг учун ҳам ўғлини ўзи истаган қизга, яъни менга уйлантирди. Ёш келинлигимда уй юмушларини яхши уддаласам, «Баракалла, ўзимнинг келинимсиз-да, ўзим танлаганман сизни», деган сўзларни эшитардим. Бу мақтовдан кўнглим тоғдек кўтарилиб кетарди. Тўйдан олдин эса бўлажак турмуш ўртоғим «Мен бир ночор қизга кўмаклашиб тураман, турмуш қурганимиздан кейин бу ишимга тўсқинлик қилмайсиз», деб шарт қўйган. Мен содда ҳеч нарсани тушунмай рози бўлаверганман. Мана, орадан бир неча йил ўтди, қўчқордай ўғилни дунёга келтирдим, лекин турмуш ўртоғимнинг меҳрини тўлалигича қозона олмадимми, деб қўрқаман. У киши ўзи ишлайдиган ташкилотда фаррошлик қиладиган бир қизга моддий томондан кўмаклашиб туради. Бор муаммо шунда бўлса, ҳеч сўз демасдим. Аммо менга нисбатан муносабати совуқ, доим ишдан қорни тўқ келади, ахир эркак киши ярим коса шўрвани «кўрдим» демайди-ку, эрим бўлса «Кўп сузибсан» дея танбеҳ бергани-берган. Тўйимизда куёвжўралик қилган дўстининг хотини билан гаплашиб қолгандим. Айтишича, ўша эрим кўмаклашиб юрадиган қиз енгилтак бўлиб, эркакларнинг «саҳоватпеша»лигидан фойдаланиб юраркан. Ўша қизни деб уйимизда кунда-кунора жанжал, ҳатто қайнонам билан ҳам орамизга совуқчилик тушгандек. Ёки мен ҳаддан ташқари рашкчиманми, билмадим? Нима қилсам, турмуш ўртоғим билан муносабатларимиз яхшиланади? Маслаҳат беринг.

Қайнонажон: — Қайнонасининг меҳрини қозонган келин экансиз, раҳмат сизга. Бироқ ўринсиз рашк, ҳатто онанинг ҳам кўнглини совутиши мумкин, қизим. «Наҳот боламга ишонмайди, ўғлим шунчалик ёмонми…» деган фикрлар она шўрликнинг ақлини эговлайверади-да. Она — она-да! Қора қўнғиз ҳам боласини оппоғим, дер экан. Балки сизнинг гумонларингизда жон бордир, ўта раҳмдил одамлар муҳтож кимсага яхшилик қилишни, моддий жиҳатдан қўллаб-қувватлашни афзал санайдилар. Ота-боболаримиз бу жиҳатдан яхшилик, ҳайр-эҳсон ва мурувват кўрсатишнинг меъёрларини аниқ билишган ва шунга амал қилишган. Яхшиликни ҳаддан оширмаслик учун ёрдамини маҳалла, ўша аёлнинг эркак кариндоши ёки ўз онаси, аёли орқали амалга оширса, маъқул иш бўларди. Оилада бадгумонлик, жанжал ҳам бўлмасди. Она қизим, оила мустаҳкамлигига путур етмаслиги учун ушбу фикрларни қайнонангизга айтиб маслаҳат солинг. Шунда сих ҳам, кабоб ҳам куймаса керак, деб ўйлайман. Хўжайин билан чиройли муносабатни сира бузманг. Оқибати хайрли эмас. Ростми, ёлғонми бу гаплардан хафсаласи пир бўлиб, эрингиз «бор-э» деб юбормасин тағин. Эркакларнинг бу борада сиркаси сув кўтармайди. Эҳтиёткорлик муҳим, бахтни қўлдан чиқарманг. Яхши гап яхши, болам. Аввало кўнгилни пок тутишга урининг. Жуфти ҳалолингизга ишонинг. Мабодо гумонлар ич-этингизни кемирса ҳам, билинтирмай туриб, «муолажа»сини кечиктирмай, қайнонангиз билан маслаҳатлашиб, амалга оширинг. Билсангиз, бу масалада қайнона онангиздан ҳам яқин сирдош, маслакдош бўла олади. Чунки хеч бир она фарзандининг оиласи пароканда бўлишини ёки бошқа бир аёл қўлида ўйинчоққа айланишини истамайди. Оилангиз тобора мустаҳкамланишини тилаб қоламиз.

Шаҳноза ХАЛИЛОВА, руҳшунос: — Ҳаётда турли вазиятлар бўлади. Баъзан аёллар ўринсиз рашк туфайли бегуноҳ бир инсоннинг шаънига доғ туширишлари ёки ўзларидан совутиб юборишлари ҳам мумкин. Бунинг олдини олиш учун эса биринчи галда шубҳаларни тутундек тарқатиб юбориш шарт. Асло шубҳага таяниб қарор қабул қилманг. Акс ҳолда кейин афсуда қолишингиз ҳеч гап эмас. Баъзан «саҳоватпешалик» ниқоби остида фақат ўз нафсинигина ўйлайдиган кишилар ҳам учраб туради. Бундай эркакларни қайнонаси ёрдамида йўлга солган аёлларни учратиш мумкин. Яъни ўзи билмаган киши бўлиб, қайнонаси орқали бировнинг эрига илакишиб юрган аёлнинг маҳалладошлари, ота-онаси, қон-қариндошлари олдида танобини торттириб қўйган хотинларни ҳам кўрганмиз. Ҳаёт, бу — синов. Баъзида синовларга сабр қилиш керак бўлса, баъзан ўзига тегишли нарсаларни ҳимоя қила олиш лозим. Қай йўлни танлашни эса вазиятга қараб, кишининг ўзи ҳал этиши даркор.

Саодат ОЧИЛОВА ёзиб олди.
Manba: Darakchi.uz