Дори воситалари

Дори воситалари озиқ-овқат маҳсулотлари ва суюқликлар биргаликда қабул қилинганда, улар дори таъсирини фаоллаштириши ёки аксинча нейтраллаши мумкин. Бугун дориларнинг бошқа воситалар билан муносабати ҳақида сўз юритамиз.

АНТИБИОТИКЛАР
Ушбу дори воситалари жуда инжиқдир. Нордон шарбатлар, газланган сув, қаҳва, сут ва сут махсулотлари билан биргаликда қабул қилиниши тетрациклин ва пенициллин қатори антибиотикларнинг сўрилишини камайтиради. Углеводларга бой таомлар билан биргаликда қабул қилинса, ушбу дориларнинг парчаланишига олиб келади. Шунингдек, антибиотиклар билан биргаликда витаминларни қабул қилиш мумкин эмас. Баъзи витаминлар хаттоки антибиотикларга нисбатан аллергик жараёнларни кучайтириши мумкин. Шу билан бирга антибиотиклар витаминларни парчалайди.

АСПИРИН
Таркибида кўп миқдорда витамин С сақловчи сабзавотлар организмдан аспирин чиқарилишини тезлаштиради. Аспирин, шунингдек, сариёғ, сметана, ёғли махсулотлар билан яхши "келиша" олмайди. Нордон мевалар ва сабзавотлар аспирин таркибидаги моддаларнинг фаоллашувига, бу холат эса препарат токсиклигининг кучайишига сабаб бўлади.

ПАРАЦЕТАМОЛ
Парацетамолни таркибида кўп оқсил сақловчи маҳсулотлар, нордон мевалар, сабзавот шарбатлари билан бирга аралаштирмаслик керак.

АНАЛЬГЕТИКЛАР
Анальгетикларни колбаса, қуритилган балиқ маҳсулотлари, консервалар билан биргаликда истеъмол қилмаслик керак.

АЛКОГОЛЬ
Барча дори воситалари ҳар хил даражада алкоголь билан бирга фаол реакцияга киришади.

"Бекажон" хафтаномаси