Янги йилни кўнгилдагидек кутиб олиш учун 7 қадам

1-қадам: Янги йил ажойиботларга тўла байрам. Сиз ҳам болаликдаги каби мўъжизаларга ишонасиз. Янги йил оқшомини хуш кайфиятда, оилангиз ва фарзандларингиз қуршовида, тўкин дастурхон атрофида кутиб оляпсиз. Шунинг ўзи бир мўъжиза эмасми? Айтишларича, Янги йил кечаси қандай ўтса, кириб келаётган йил ҳам шундай бўлар экан. Демак, йил давомида ҳар куни сизни мўъжизалар кутишига ишонинг.

2-қадам: Янги йилдан фақатгина яхшиликлар кутинг. Ўтган йил учун шукр қилинг. Ёмон хаёлларни ортда — эски йилда қолдириб, улар сизнинг ортингиздан эргашишларига йўл қўйманг.

3-қадам: Янги йилда «доим бизга бош бўлиб юринг» дея қайнона-қайнота, ота-онангизни қутлаб, байрамни сизникида кутиб олишга таклиф этинг. Чунки сиз байрамни севимли инсонларингизсиз тасаввур қила олмайсиз.

4-қадам: Байрамона кайфиятни ўзингиз ярата оласиз. Болаларингиз билан байрам кечасида арча атрофида турли ўйинлар, саҳна кўринишлари, шеърлар айтишувини ўтказишингиз мумкин. Фарзандларингиз қанчалар зукко ва ақлли! Бу сизнинг бахтингиз!

5-қадам: Совғанинг катта-кичиги бўлмайди, асосийси эътибор. Бу ҳақиқат! Шунинг учун ўз қўлингиз билан ясаган, тиккан, тўқиган буюмларингиз қимматбаҳо нарсалардан аъло эканлигини яхши биласиз. Совғалар билан оила аъзоларингизни хушнуд этиш сизга ҳам хуш кайфият бағишлайди.

6-қадам: Янги йил кечасининг ягона гўзалисиз! Чунки лабингиздан табассум ҳеч қачон аримайди. Бежирим соч турмаги ва эгнингиздаги ораста либос эса гўзаллигингизни яна бир карра намоён этади.

7-қадам: Янги йил кириб келаётганидан дарак берувчи соат бонгини эшитдингизми? Янги йилнинг илк дақиқаларида орзу-истакларингизни хаёлингиздан ўтказинг. Уларнинг ижобатини чин дилдан хоҳланг. Хаёллар бир кун албатта моддиятга айланади.