​Rediska eng, shamollamaysiz!

To`q pushti rangdagi rediska tarkibida oqsil, uglevod, vitamin va mineral tuzlar bo`lib, ko`klam payti toliqqan organizmga tetiklik ulashadi. Rediskani qatiqqa yoki to`g`ralgan karam va sabziga qo`shib salat ko`rinishida iste`mol qilishi mumkin. Shu bilan birga po`stini archib, butunligicha ham esa bo`ladi. XALQ TABOBATIDA Agar sizni radikulit bezovta qilsa, bir bog` rediskani qirg`ichdan o`tkazib, ikki qavat dokaga o`rang. So`ng og`riq berayotgan sohaga kompress qiling. Bosh og`rig`idan bezor bo`lsangiz uni ham rediska yordamida davolash mumkin. Buning uchun 2-3 ta rediska sharbatini peshona, chakka va ko`z atrofiga surtib chiqasiz. Qabziyat bilan muammo bo`lganida har kuni yarim kosa rediska+qatiq+shivit+kashnich aralashmasini iste`mol qiling. Muolajaning asosiy sharti aralashmaga tuz qo`shilmasligi kerak. Rediskadan kosmetologiyada ham foydalanish mumkin. 2-3 ta rediska sharbatini istalgan o`simlik yog`i bilan aralashtirib, 1 choy qoshiq kartoshka kraxmalini qo`shing. Hosil bo`lgan aralashmani yuzga surtib, 15 daqiqaga qoldiring. So`ng iliq suvda chayib olasiz. Rediskali niqob yuz terisini oziqlantiradi. ORGANIZMGA FOYDASI HAQIDA: – Surunkali charchoq, immunitet sustlashishi hamda kamqonlikka qarshi kurashda rediska ajoyib ko`makchidir. Kunora 2 tadan rediska eyishga odatalansangiz, ikki yonog`ingizga qizillik yugurib, gemoglobin miqdori ortadi. – Kechki ovqatda yog`li, qattiq qovurilgan taomlarni rediska qo`shilgan salat bilan birga iste`mol qilish hazm faoliyatini yaxshilaydi. – Rediska me`da kasalliklari bilan og`riganlar uchun ham foydalidir. Tarkibidagi kletchatka oshqozon suyuqligi ishlab chiqarilishini rag`batlantiradi. – Avitaminoz yuzaga kelmasligi uchun ko`klam chog`i rediskani kanda qilmaslik kerak. – Bir kunda atigi bir marta rediska qo`shilgan salat yoki egulik esangiz, askorbin kislotasining bir kunlik miqdoriga ega bo`lasiz. – Kam kaloriya mahsulot ekanligi sabab parhezdagi xonimlar uchun asqotadi. – Qandli diabet bilan og`rigan bemorlar rediskani ko`proq tanovul qilishlari lozim. Bu poliz ekini tarkibidagi moddalar qonda qand miqdorini me`yorlashtiradi. – Eng foydasi – rediskadagi fitosidlar bo`lib, organizmni chiniqtirishi bilan ajralib turadi.