Суюклигингизга қандай кўринасиз?

Меҳрибон, куйинчак ёки “изқувар” — бу таърифларнинг қайси бири сизга мос? Эҳтимол, хатти-ҳаракатларингиз кўнгил қўйган инсонингизда ўзгача тасаввур қолдираётгандир. Келинг, муносабатларингизни кўриб чиқамиз...

 

Оналарча ўта ғамхўрлик…

“Шамоллаб қолмадингизми? Тезда дори ичиб олинг-а!” ёки “Ишда чарчагандирсиз, ухлаб дам олволинг…” Бу каби эътибор даставвал сиз ҳақингизда ёқимли таассурот уйғотиши рост. Ҳатто кўнгил қўйганингизнинг бундай эътирофдан ўзига нисбатан ишончи ҳам ортади.

“+” феълингизда куйинчакли бўлса, келажакда оилангиз учун ҳам меҳрибон аёл бўла оласиз. Айни мана шу хислатингиз туфайли ҳам ёрингиз билан аҳил-иноқ яшашингиз мумкин.

“-“ Бироқ асалнинг ҳам ози яхши. Баъзи йигитлар оналаридаги ўта ғамхўрликни танлаган ёрларида ҳам кўришни исташмайди. Мулоқот чоғи ўзингизни куйинчак тутишингиз эса унинг наздида ўзини кўрсатиш ёки унга эга чиқишни истаётгандек кўриниши мумкин.

 

Етакчи ким: сизми ёки у?

Ташаббускорлик яхши фазилат. Ҳатто йигит-қиз муносабатларида ҳам кези келганда бир тараф айрим масалаларда етакчиликни қўлга олгани дуруст. Агар сиз айни мана шундай пешқадамлардан бўлсангиз, демак муносабатларингизга сиз ўта жиддий ёндошгансиз. Йигитингиз ҳам буни  яхши билади.

“+” Кўнгил қўйганингиз сиз билан кейинги ҳаётини тасаввур қилар экан, оилавий масалалардан чўчимаслиги, ҳар қандай оғир вазиятлар унга далда бўлишингиз ва йўл кўрсата олишингизга ишонади. Бу эса оила қуриш танловида бўлган йигитларга жуда муҳим.

“-“ Шундай бўлса-да, йигит киши ҳамиша бир поғона олдинда юришни ҳоҳлайди. Бу эса етакчилигингизни ҳадеб номоён этавермаслик керак дегани. Борди-ю, у барчасини ўзингиз уддалашингизга ўрганиб қолса, кейинги биргаликдаги ҳаётингизда ҳам шу тариқа давом этаверади. Ўйлаб кўринг, бу сизга керакми?

 

Эҳтимол, “қўриқчи”дирсиз?

Ушбу сўз билан ёрингизни ҳаддан ортиқ севишингиз ва рашкчи эканлигингизни назарда тутдик. Тўғри, уни барчадан қизғанишингиз муносабатларингизга аллақандай кўринмас илиқлик бағишлайди. Ҳатто шунчаки танишув билан бошланган учрашувингиз ҳам айнан мана шу туйғу билан жиддийлашиши мумкин.

“+” Ёрингизни рашк қилиб, ярми чин, ярми ҳазил суриштирувларингиз унга мароқ бағишлайди. Ахир, йигитлар бундай “ёқимли назоратдан” ўзларини янада қатъиятли сезишади-да! Қолаверса, аксарият йигитларда “Ёрим мени қизғанаяпти, демак, муносабати жиддий” деган тушунча бор.

“-“ Бир тарафдан эса ким билан ўтиргани-ю, дўстларининг исм-шарифини билишга қизиқишингиз унинг сиздан совиб кетишига олиб келади. Ахир, эр йигит қиз бола тарафидан “тергов” қилинишини ҳоҳламайди-да. Ҳатто у кўнгил қўйгани бўлса ҳам... Қолаверса, йигитлар табиатан “эркин овчи”. Агар унинг ҳос соқчиси бўлишга ҳаракат қилсангиз, бир умр давом этувчи “суриштирувлардан” чўчиб, муносабатларингизга нуқта қўйиши мумкин.

 

“Бирам пазандаманки...”

Суйганингиз билан муносабатларингиз турмуш қуриш режалари билан боғлиқ бўлса, демакки, байрам ёки таваллуд кунларида совға алмашиб турасиз. Балки унинг яқинларига ҳам бир нималар совға қилишга улгургандирсиз. Бир тарафдан бундай илтифот ёрингиз билан муносабатларингизнинг жиддийлиги ва унинг яқинларига ҳурматингизни кўрсатади. Бошқа томондан эса....

“+” Бўлажак қайнонангиз эътиборингизни тушунса-ку, хўп-хўп. Эҳтимол, унинг дидига мос келаётган совға танлашингиз ва кўнглини олишга уринаётганингизни маъқуллар ҳам. Ёрингиз ҳам келгусидаги қайнона-келин муносабатларидан кўнгли тинч бўлади.

“-“ Аммо байрам ёки йиғинларда патнисни “тўлдириб” бериб юборган ширинлигингиз бўлажак оила аъзоларингизга ёқмаслиги ҳам мумкин. Улар наздида гўё ўғли орқали хушомад қилаётгандай бўласиз. Қанчалик моҳир пазанда ва уддабурон “тадбиркор” бўлманг, кези келганида буларни ошкор қилмай турган ҳам маъқул-да! Ахир, янги хонадонга янгилик олиб келиш бир фильмни такроран кўришдан яхшироқ чоғи...

 

“Шантажчи” бўлманг тағин...

Ҳис-туйғуларга асир бўлган йигитлар баъзида “Ўзимни ундоқ қиламан, бундоқ қиламан” деган пўписаларингизга жавобан муҳаббатларини аямай, йўлларингизга поёндоз солишга ҳам тайёр бўлишади. Шундайми, қизларжон? Буни ҳам муҳаббатнинг “ширин даврига” киритиш мумкин. Бироқ...

“+” Анча вақтдан бери бир-бирингизни яхши билсангиз, ёрингиз  дўқ-пўписангиздан “Мени шунчалик севар экан” деб ўйлаши мумкин. Ҳатто бундан ўзича мағрурланиб ҳам қўяди. Тўғри, баъзида шундай вазиятлар бўладики, айтаётган гапингиз чин эмаслигини билдирган оҳангда “қўрқитиб” туриш мумкин. Муносабатларингиз жиддий бўлса, бундай сўзлашув тили бир-бирингизга бўлган туйғуларингизни “элакдан ўтказиб” қўяди.

“-“ Суйганингизни назоратда ушлайман деб, “шантаж” қилишни афзал билсангиз, жиддий муносабатларни хаёл қилмай қўя қолинг. Ахир, йигитлар ҳам ўз қадри ва ғурурини билган қизларни ёқтиришади. Қолаверса, бундай қилиқларингизни унинг яқинлари эшитса борми, шарманда бўлганингиз қолади, холос. Кейинчалик ёрингиз билан турмуш қурган тақдирингизда ҳам сиз ҳақингизда “шантажчи келин” дейишлари мумкин.

 

Дўстларсиз...

Севганингиз нима истаётганингизни юз ифодангиздан уқиб олади. Сиз ҳам худди шундайсиз. Бир-бирингизни сўзсиз тушунганингиз муҳаббатдан-да ошиқроғ, дўстларча ўзаро ҳурмат борлигини ҳам англатади. Зеро оилавий хаётда ҳам бир-бирини дўстона тушуниш жуда катта вазифа.

“+” Ёнида сиз каби суюклиги ва бир вақтнинг ўзида жонкуяр дўсти борлигидан йигитнинг боши осмонга етиши аниқ. Ахир, ким ҳам дўст бўлишни уддалолмайди.

“-“ Лекин “дўст ачитиб гапирар” дея фурсати келганда тилингизга эрк бериб юборишингиз ҳам яхши эмас. Айниқса, келажак режаларингиз жиддий бўлса, унга аввало қандай умр йўлдош кераклигини тушуниб олинг. Шунга кўра дўстона муносабатингизни қай ҳолда ва қандай фойдаланишни билиб оласиз.

 

Маликаи дилором!

Ташқи кўринишингиз, дид билан кийинишингизу муомала маданиятингиз кўнгил қўйганингизни бефарқ қолдирмайди. Аксар йигитлар айнан ўзига эътибор бериб юрадиган қизларни ёқтиришади. Ахир, бошқалардан “ярқ” этиб ажралиб туришни уддалаш ҳам санъат!

“+” Сизга кўнгил қўйган инсон ўзингизга қанчалик эътиборли эканлигингизни кўриб, келгусида оиламизга ҳам шундай муносабатда бўлади, деб ўйлайди. Энг муҳими, “Бир умр ёнимда ўзига оро беришни билган, хушбичим  аёлим бўлади” дея қувонади.

“-“ Диққат марказида фақат ўз дунёқарашингизу ташқи кўринишингиз бўлиши ҳам тўғри эмас. Сизга маҳлиё бўлган ёрингиз бора-бора “Фақат ўзим бўлай” дейишингиздан зерикиб, “Фақат сиз керак” дейдиганини излаб қолади. Агар танлаган инсонингизнинг турмуш қуриш ниятига ҳайриҳоҳ бўлсангиз, “маликалардай” бўлинг-у, «қирол»ингизни ҳам тахтга ўтказиб, ҳурматини бажо келтиринг.

Маржона РАҲИМОВА

Manba: Darakchi.uz