«Турмуш ўртоғимиздан яширадиган сирларимиз... йўқ!»

 Қизлар учун турмуш қуриш – кўп йиллик орзуларнинг ушалиши. Шу билан бирга ҳаёт тизгини, истаклар жиловини ёнингдаги инсонга топшириш ҳам демак. Зеро, бировнинг хасми бўлган аёл мустақил шахс бўлса-да, бугунги куни ва эртаси учун тузган режаларини умр йўлдоши билан бўлишишга масъулдир.

Хўш, қай бир ҳолатлардан аёл турмуш ўртоғини бохабар қилиши, у билан бу борада маслаҳатлашиши шарт? Қуйида буни бирма-бир таҳлил қиламиз.

Қаерга, қачон ва ким билан?

Янги келинлик пайтингизни бир эсланг. Борадиган жойингиз фақат отангизнинг уйи бўлса ҳам, бу саволга аниқ жавоб берардингиз. Тўғрироғи, турмуш ўртоғингиз белгилаган тартибга қатъий амал қилардингиз. Шу маънода аёл киши кун давомида доимий режадан ташқари бирор жойга бормоқчи бўлса, бундан, албатта, турмуш ўртоғини хабардор қилиши шартдир. Тўғри, “Болани боғчага олиб бордим, олиб келдим” дея ҳар қадамда ҳисобот бериш,  эрни ишдан чалғитиш ҳам ярамайди. Бу эркакнинг хоҳиши бўлса-ку, бошқа гап.

Аёл эркак кишининг ишончини арзимаган нарсалар туфайли ҳам йўқотиши мумкин. Дейлик, бозорга бораман, деб қайтишда онангизникига бош суқиб ўтдингиз. Ярим йўлда қайнукангизни кўриб қолсангиз борми?!

Касални яширсанг, истимаси ошкор қилади

Жуда кўп аёллар бирор ерлари оғриётгани ҳақида турмуш ўртоқларига айтишмайди. Айниқса, гинекологик муаммоларни сир тутишади. Бу тўғримикин? Эр ва хотин бир-бирини соғ пайтида ҳам, бемор ҳолида ҳам бирдек севиши ва ардоқлаши керак эмасми? Ой кунлари, чилла ёки бошқа нозик вазиятларда эрни огоҳлантирмай, азият чекиб юриш ярамайди. Сиз – аёлсиз, оналик бахтини туйишингиз, фарзандларингизни оёққа турғазишингиз керак, шунинг учун ҳам ўзингизни асранг. Шифокор касалингизни аниқлагандан сўнг, уни яширишдан ҳеч маъно йўқ. Эрингиз ҳам билсин, иложи бўлса, кўрикларга у билан бирга боринг, токи, ёнидаги инсоннинг 40 та жони бўлгани билан, у биттагина заиф вужудда уриб турганини тушунсин.

Мақсадни очиқ айтган маъқул

Кўпинча, эркаклар биз, аёлларнинг ҳам мақсаду режаларимиз бўлиши мумкинлигини унутиб қўйишади. Чунки бу хусусда уларга айтмаймиз, орзу-мақсадларимиз қанчалар муҳим эканини тушунтирмаймиз. Тўйдан кейин “Чимилдиқ” фильмидаги келинга ўхшаб: “Менинг орзуларим бор эди” дея рўмол ғижимлагандан эса фойда йўқ. Яна бир гап. Орзу билан мақсаднинг фарқи бор. Мақсадга етиш учун ҳаракат қилишнинг имкони мавжуд бўлиши керак. Оилали аёл эса эрнинг ёрдамисиз бу имконни топа олмайди. Ёдда тутинг, айтилмаган истак бажарилмайди, эрингиз билан ҳаётингиз сизнинг барча мақсадларингизга қарши чиқар экан,  бу сизни ҳаётдан қониқмаслик ва норозилик кайфиятига олиб келиши мумкин. Агар машина ҳайдашни орзу қилаётган бўлсангиз, турмуш ўртоғингизга болаларни боғча-мактабдан ўзингиз олиб келишингиз, бу билан вақт тежалиши мумкинлигини айтинг, то машина олишга имкон топилгунига қадар ҳайдовчилик гувоҳномасини олиш учун ўқишингизга рухсат беради.

Болаларнинг хатоси сир тутилмайди!

Ўғлингизнинг баҳолари пасайиб бораётгани, мактабда ёқалашгани ёки чўнтагидан тамаки топилгани, қизингизнинг синфдошлари билан кинога бориши кабиларни эрингиздан яшириб, хато қиласиз. Болалар ота ва онаники. Демак, барча масалаларга биргаликда, маслаҳатлашган ҳолда ечим топиш керак. Матога томган сиёҳни қанча беркитишга уринманг, унинг доғи ёйилиб бораверади. Шундай экан, муаммолар катталашмасидан иссиғида эрингизни хабардор қилинг, ота ва она бола тарбиясида якдил бўлса, муаммолар ҳам камаяди.

Даромадингиз қанча?

Ишлаётган аёл турмуш ўртоғининг маоши ёки хусусий тадбиркорликдан топаётган даромади қанча эканини яхши билади. Чунки бу ҳақда тасаввурга эга. Умуман олганда, оилавий бюджетнинг асоси – бу эр-хотиннинг биргаликдаги даромади ҳисобланади. Аёл киши ўз маоши, ишлаб топаётган пулини камайтирмай, унинг миқдори қанча эканлигидан эрини бохабар қилгани маъқул. Шунга яраша биргаликда режа тузилиб, харажат қилинади ва ўзаро ишончга путур етмайди.

Харажатлар-чи?

Тан олиш керак, аёл эркакка нисбатан кўпроқ харажат қилишга мойил. Эътибор берсангиз, бу харажатлар кўзга кўринмайдиган нарсаларга сарф бўлади, аммо ўша буюмларсиз хўжаликни юритиб бўлмайди. Аслида, аёл киши бирор тийинини ҳам оиласидан ташқарига ишлатмайди, пул ишлатса, эрига пайпоқ, боласига иштон сотиб олади. Эркак эса топган даромади ёки хотинининг маоши нимага сарф бўлганини тушунмай, пулнинг қадрига етмайсан, деб аёлни танқид қилади. Шундай бўлмаслиги учун нимага неча пул сарф қилганингизни очиқ айтинг, иложи бўлса ёзиб қўйинг. Уч ойда биттагина кофта сотиб олиб, ўшанинг ҳам нархини пасайтириб, қўрқиб айтсангиз, ёлғонингиз кўпаяверади. Кейин бошқа харажатларни кўпайтириб айтишингизга тўғри келмаслиги учун рост гапиринг.

Дўсту дугоналар билан алоқа

Сизнинг ҳамкасбларингиз, болаликдаги дўстларингиз, дугоналарингизни эрингиз таниши, улар билан мулоқотда бўлиши ниҳоятда муҳим. Уйингизга яқиндагина келиб-кетган дугонангиз, қўнғироқ қилган ҳамкасбингиз билан нима ҳақида гаплашганингизни у оз бўлса ҳам билиши керак. Ортиқча рашк туғилмаслиги учун улар ҳақида эрингиз истаганича маълумот беринг. Кўпинча, эркак киши хотинининг бирор дугонасини ёқтирмай, у билан мулоқотдан чеклаши мумкин. Бунинг ҳар доим етарлича сабаби бўлади, чунки эркак киши ким қандай эканлигини яхши билиш қобилиятига эга. Шу маънода дугонангизнинг тарбияси, қизиқишлари сизга таъсир қилмаслигини истар экан, эрингизга қулоқ солинг.

Қўл телефони, электрон манзил...

Замонавий аёлда ҳамма нарса бор: уяли алоқа, интернетдаги макон... Турмуш ўртоғингиз бунга рухсат берган экан, ишончини оқланг. Электрон почтангиз, профилингизнинг “очқич”ини эрингиздан сир тутманг. Бу билан сиз ҳеч нима йўқотмайсиз. Эрингиз эса истаган пайтда сизни текшириши мумкинлигига ишонч ҳосил қилиб, кўнгли хотиржам бўлади.

Ва яна айрим ҳолатлар бор

Аёл киши бегонанинг фарзандига эридан берухсат кўкрак тутиши мумкин эмас. Гўдакни эмизиш хайрли иш, лекин ўша чақалоқ икки ёшдан кичик бўлса ва ўзининг туққан онасидан бошқа бир аёлни эмиб, қонига сут кирадиган бўлса, уни эмизган аёл сут онаси бўлади ва аёлнинг эри чақалоққа эмизикли ота бўлади. Шу боис бировнинг фарзандини эмизаётган аёл турмуш ўртоғидан рухсат сўраб,  амалга оширмоқчи бўлган савоб ишидан уни бохабар этиши лозим.

Меҳрингизни дариғ тутманг!

Биз, аёллар телевизор қаршисида ухлаб қолган турмуш ўртоғимизнинг устига меҳр билан аста кўрпа ёпиб қўямиз-у, лекин туғилган кунида унга тузукроқ тилак билдира олмаймиз, уни жонимиздан ҳам ортиқ кўришимизни тилга чиқариб айтолмаймиз. Негадир, уяламиз, тортинамиз... ҳар куни эмас, ҳеч бўлмаса, байрам кунлари турмуш ўртоғимизни бирор яхши гап, илиқ дил изҳори билан хушнуд қилиш қийин эмас-ку, ахир. Келинг, ЯХШИмиздан яхши гапларни аямайлик!

Азиза ҚУРБОНОВА

Manba: Darakchi.uz