​YuZDAGI DOG`LAR JIGAR KASALLIKLARIDAN DARAKMI?

Yoshim 38 da. Yuzimda katta – kichik jigarrang dog`lar paydo bo`layapti. U qadar ko`zga tashlanmasada, pardoz qilayotganimda seziladi. Dog`lar o`ng qo`l kaftimda ham bor. Dugonalarimdan biri bu jigar faoliyati bilan bog`liq o`zgarish dedi, ayting-chi shu rostmi?

Hilola Sattarova, Navoiy viloyati

Savolga oliy toifali shifokor – terapevt Nodira HAMROEVA javob beradi:
Noto`g`ri ovqatlanish, nosog`lom turmush tarzi, dori preparatlarini ko`p miqdorda va pala – partish qabul qilish, zararli odatlar va ekologiya ta`siri jigarni xastalantiradi. Organizmning filtri hisoblangan a`zodagi o`zgarishlar esa dastlab tashqi taraflama ayonlik beradi, ammo ko`pchilik buni payqamaydi. Jigar faoliyatidagi buzilishlarga ishora qiladi:
Peshonadagi chuqur joylashgan ajinlar, ular qanchalik keng va yaqqol ko`zga tashlanadigan darajada bo`lsa jigar disfunksiyasiga ishora deb biling;
Jigarda bir qancha biokimyoviy jarayonlar sodir bo`ladi. Xususan, teri rangi uchun javobgar melanin pigmenti almashinuvini ham. Ushbu hodisa terida jigarrang va yashilsimon pigment dog`larning paydo bo`lishi bilan kechadi. Odatda dog`lar oqartiruvchi muolajalarga bo`y bermaydi, shundan ham bilish mumkinki, bu jigarning ishi;
Yuqorida jigarni inson organizmining filtri dedik, mana shu filtr zararli toksinlar hamda chiqit moddalarning tashqariga chiqishi uchun xizmat qiladi. Agar jarayonda nosozlik kelib chiqsa, organizmning keraksiz «xom-ashyo» si teri yog` bezlarida to`planadi va teringizning yog`lilik darajasi oshishi mumkin. Anglaganingizdek, terining haddan ortiq yog`lanishi ham jigar faoliyatidagi o`zgarishlardan darak berishi mumkin;
Jigar funksiyasining buzilishi organizmda oziq moddalarning qabul qilinishini sekinlashtiradi. Bu esa dastlab soch tuzilishida aks etadi. Erta soch oqarishining sabablaridan biri deya jigar kasalliklari aytilishi bejizga emas;
Ko`zguga boqing-da, ko`z oq pardasining rangiga ahamiyat bering. Aksariyat jigar xastaliklarida oq parda sarg`imtir tus oladi;
Til ustki qismi rangining o`zgarishi, milklar yallig`lanishi va og`iz bo`shlig`i kasalliklari ham jigardagi o`zgarishlar tufayli kelib chiqishi mumkin.
Guvohi bo`lganingizdek, jigardagi o`zgarishlardan darak beruvchi alomatlar ko`p. Sizda qay biri kuzatilayotganiga qarab, albatta shifokorga murojaat qiling. O`z vaqtida bajarilgan davo choralari, keyingi asoratlarning oldini olishda muhimdir.
Manba: Darakchi.uz