Главная » Hikoyalar » BIZNI TAQDIR BIRLAShTIRGAN...
BIZNI TAQDIR BIRLAShTIRGAN...

BIZNI TAQDIR BIRLAShTIRGAN...

  • Категории: Hikoyalar
  • Название: BIZNI TAQDIR BIRLAShTIRGAN...
  • Дата релиза: 14-08-17, 16:37
BIZNI TAQDIR BIRLAShTIRGAN...
Taqdir! U bormi o`zi? Peshanaga yozilgani-chi? Undan qochib qutila olmasligimiz rostmi? Men bugungi hikoyam qahramonlari bilan tanishganimda taqdirning haqligiga ishonganman. Bir qarashda, ularning hayotida qandaydir kemtiklar bordek, umr yo`llari bir tekismasdek... Balki, kimlardadir achinish hissini ham uyg`otar. Ammo men chin ma`noda ularga havas qilganman. Irodalariga, er yuzidagi farishtalar ekanligiga...

Risolat opaning yoshi ellikdan oshgan. O`rtancha qizi bilan opam birga o`qishgan. Uyimizga kelib-ketib yuradigan bu qiz hammamizga birdek yoqardi. Keyin uning onasi opam bilan tanishgan. Shu tariqa ikki dugona sabab oilalarimiz o`rtasida bordi-keldi yo`lga qo`yilgan. Risolat opa kamsuqim, samimiy ayol. Har mehmonga kelganida qimtinibgina o`tiradi. Oyim o`n gapirsa, zo`rg`a bir javob beradi. Ammo tilining uchida turgan so`zni doim aytolmaydi. U ketgach, «Nimadir dardi bor-da shu ayolning», deya oyim bosh chayqab qolardi. Bir yillik bordi-keldimizdan keyin Risolat opaning dardi ma`lum bo`ldi. Necha yildirki, onasini izlarkan. Hayron qoldik, to`g`risi. Uning mahzun hikoyasini tinglab esa ko`zimizga yosh oldik.

«Onam shaharlik. Men yolg`iz qizman. Beshikdaligimdayoq ota-onam ajrashib ketishgan. Yashirib nima qildim, to`g`rirog`i, onam otamni tashlab ketgan. Nima uchun, bilmadim... Keyin ammalarim majburlab ayamga uylantirib qo`yishgan. Men ham aqlimni tanigach, u kishining o`gayligini bilganman. Baraka topgur, biror marta o`gaylik qilmagan. Asli tug`masmidi, yo otamning «O`zi bolali bo`lgach, qizimni begona qiladi, biror bolaga zor ayol bo`lsagina, uylanaman, bo`lmasa, yo`q» degan qat`iy qaroridan keyin farzand ko`rmaganmi, bunisi menga noma`lum. Meni oq yuvib, oq tarab ulg`aytirdi. Mana, otamdan keyin ham bosh bo`lib o`tiribdi. O`z onamni esa bir martagina ko`rganman. Eslay olganim shu. Aytishlaricha, bog`chaga kelib, uzoqdan meni ko`rib ketarkan. To`yim oldi o`gay onam sizlarning qishloqqa olib kelgan va bir ayol bilan tanishtirgan. O`shanda bir og`iz ham gapira olmaganman. Onam esa meni quchib yig`lagan. Bir etak bolalari bor edi. Keyin ko`rishmadik. Ko`rishishga jur`at qilmadik, shekilli... Yoshi etmishdan oshib qolgan, ko`p tushimga kirayapti. Ammo menda manzillari yo`q. Shu kungacha izlashga ayamdan iymanganman. Go`yoki ular bilan topishib olsam, meni o`z bolasidek ko`rgan ayolga xiyonat qiladigandek tuyulaevardi... Yana mendan, eridan yuz o`girgan odamga nisbatan ichimda qandaydir alam bor edi... Yillar o`tib, bu alam tarqadimi, bilmadim... Yoki taqdir mening ko`zlarimni ochdi...

Ramz aka bilan ishda tanishganman. U kishi hisobchi edi. Chekka tumandan markazga qatnab ishlardi. Qismat ekan, bir-birimizga ko`ngil qo`ydik. Otam yolg`iz qizimni kimga uzatayapman deya, kuyov bilan ko`rishgan ham. U zamonlarda bunaqa gaplar yo`q edi-da. Qarang-ki, bir suhbatlashishgandayoq dadamga ma`qul bo`lib, hayotimiz bog`landi. To`y ham o`tdi. Baxtli kelinchak edim... Toki... yo`q bu hodisa aslida meni yanada baxtli qilgan. Ha, endi shunga amin bo`layapman. Chillamiz chiqqach, qaynonam uyimizga (alohida hovliga kelin qilishgandi meni) bir bolakayni etaklab keldi. Uch-to`rt yoshlardagi ko`zmunchoqdek kichkintoyni jiyanlarimizdan biri deb o`ylabman. Ammo kechki taomdan so`ng hammasi ma`lum bo`ldi. Ramz aka oldin uylangan, xotini esa eri va o`g`lini tashlab, kim bilandir qochib ketgan ekan...

O`sha tun hech kim uxlamadi. Faqat o`z tuqqan onasi voz kechgan, yana bir ayol uning borligidan dahshatga tushgan go`dakdan boshqa...

Urishdim, yorim deya ishonganimning ko`ksiga mushtlab yig`ladim... Qarg`adim... va ertalab to`g`ri uyimga otlandim. Ramz akaning yalinib-yalvorishlariga quloq solmadim. Kela solib ayamning bag`riga o`zimni otdim. U ham menga qo`shilib yig`ladi. «Voh, qizim, bu taqdir. Senginani bir sinay deyapti-da» degan. Uning bag`riga bosh qo`yib yig`lab, onamning taftini ilk bor dildan tuydim. Ha, o`shanda birinchi bor, bu ayol mening haqiqiy onam ekanligini his qildim. Va ko`zlarim ochildi. Bundan yigirma ikki yil oldin, men hali to`qqiz oylik chaqaloqligimda shu ayol meni bag`riga olgan va ko`z qorachig`idek asrab katta qilgan. Xudo bugun meni sinayapti... Bir paytlari menga ona berib siylagandi, endi farzand berib sinayapti... Men... shu ayolning, hayotning oldida juda katta qarzdorman. Endi... endi bir go`dakni bolam deb qarzimni uzmog`im kerak... Axir u bola ham mendek begunoh... Bu dunyoning ko`ngilxushligining qurboni...

Ana shu o`ylar bilan oilamga qaytdim. Mana, Zufar o`g`lim o`ttizga kirdi. Men unga o`gaylik qildimmi-yo`qmi, bilmadim, ammo u menga chin farzandlik qildi. To`ng`ichim, suyanganim. «Onangizni izlaylik, ona. Uchrashing, kechiring» degan ham shu! Ammo o`z onasini ko`rmadi. U xotin boshqa yurtlarga ketib qolgan. Shunga meni ko`proq tushunsa kerak-da, armon bo`lishmasin bir-biriga deydi-da... Mana, endi, sizlarning ko`maklaringiz bilan onam bilan uchrashmoqchiman. Yuragida og`riq bilan o`tib ketmasin, deyapman. Axir bolalarimiz adashsa, yo`l ko`rsatib, ularni kechirib yashaymiz-ku...»

Zufar akaning Risolat opaning o`z bolasi emasligiga, to`g`risi, kishi ishonmaydi. Katta o`g`il bo`lsa-da, onasi bilan hovlida qolgan, uch jigariga juda mehribon, volidasini har yili ikki-uch martalab dam olishga jo`natadigan, hurmatini joyiga qo`yadigan o`g`il. Ramz aka yigirma yilcha oldin jigar xastaligidan olamdan o`tgan. Zufar aka ro`zg`or boshiga tushgach, institutdagi o`qishini tashlab, bog`ida ishlagan ekan. Bir ukasi, ikki singlisini oliy ma`lumotli qilgan ham o`zi. Risolat opaning haqiqiy tirgagi!

Risolat opa onasi bilan uchrashdi. Hozir ham bolalari bilan birga u kishining holidan xabar olib turadi. Ammo har kelganda yuragi ezilib ketadi. Etmishdan oshgan kampirning erdan ko`z yuzmasdan yig`lab o`tirishidan kuyadi. Ammo endi vaqtni ortga qaytarib, nimanidir o`zgartirib bo`lmaydi-ku...

Men bu voqeani shunchaki ikki ayolning bolasidan kechib, kimgadir ergashib ketgani haqida nafratga to`lib, yozsam ham bo`lardi. Axir bu dahshat-ku! Ammo meni taqdirning ishlari ko`proq hayratlantirdi. Risolat opaning ayasining mehri, bir begona bolani bolam degan ayolning daryo qalbi ilhomlantirdi! Bu dunyoda yaxshi odamlar, asl muhabbat, insoniy tuyg`ular borligi haqida yozgim keldi. Kimgadir achinish, undan nafratlanish emas, shunday insonlarning yuragiga chindan havas qilib yashash kerak, axir.

Shoira ShAGIAHMEDOVA
Manba: Darakchi.uz

Смс Шерлар
Ustozlarim sizlarga rahmat 2022
Ustozlarim sizlarga rahmat 2022
1 - OKTYABR O'QITUVCHILAR KUNI HAQIDA SHERLAR
Кетаман
Кетаман
SEVGI ROMANTIKA HAQIDA SHERLAR SMS
KO'ZLARIMNI TARJIMA QILING
KO'ZLARIMNI TARJIMA QILING
ONALAR HAQIDA YANGI SHERLAR
Рахмат Онажон
Рахмат Онажон
ONALAR HAQIDA YANGI SHERLAR
YORIM BO'LING
YORIM BO'LING
SEVGI ROMANTIKA HAQIDA SHERLAR SMS
O'jarliging jonga tegdi
O'jarliging jonga tegdi
SEVGI ROMANTIKA HAQIDA SHERLAR SMS
Yomg'irlar
Yomg'irlar
SEVGI ROMANTIKA HAQIDA SHERLAR SMS
Onajonim mehrizga to‘yib
Onajonim mehrizga to‘yib
ONALAR HAQIDA YANGI SHERLAR
Tanishgandik Bekatda
Tanishgandik Bekatda
SEVGI ROMANTIKA HAQIDA SHERLAR SMS
Логин:
Пароль: