​«Boy ovsin kelib, qizimga qiyin bo`ldi»

— 56 yoshdaman. Qizimni turmushga chiqarganimga o`n yil bo`ldi. Uchta farzandi bor. Qaynotasi besh-olti yil avval qazo qildi. Qaynonasi bolamga mendan ham mehribon va g`amxo`rligidan xotirjam edim. Kenja o`g`ilga badavlatroq xonadondan kelin tushirib, qudam o`zgardi-qoldi. Tavba odamzot ham shunchalik o`zgaradimi? Uch bolasi bilan qizimni haydab solib, «Odamshavanda, tagli-tugli xonadon bilan quda bo`laman» deb qoldi. Kuyovimiz esa aqlli farosatli yigit bo`lgani uchun ham otasi bilan kelishib, qizimizni bolalari bilan aldab-suldab uyiga olib borib qo`ydik. Oradan oy o`tmayoq, yana haydadi. Endi bu gal kuyovning o`zi olib ketdi. Uchinchi gal ham shu hol takrorlandi. Qizim endi bormayman, deb turib olgan…

Munavvaraxon, Toshkent viloyati Parkent tumani

— Quda xola ham bor bo`lsinlar. Xafa bo`lmang, singlim. Eng asosiysi, ikki yosh bir-birini hurmat qilar, sevar ekan, hech kim o`rtaga rahna sololmaydi. Shu munosabatni yanada mustahkamlash kerak. Kuyov aqlli bo`lsa, demak, marra sizniki. U kishiga onasini sira yomonlamaslik kerak. Aksincha, «Bolam, qudam juda yaxshi inson, nabiralarni etim qilmaydi. Faqat sizlarni tarbiyalash, kelinni sal "cho`chitib qo`yish" uchun ham shunaqa deb hazillashayaptilar» deyish kerak. Ko`ngil qurg`ur nimalarni istamaydi, deysiz. Xom sut emgan bandamiz-da. Hamma bir xil bo`lmaydi-ku, axir. Biz ayrim ayollarning tanglayimizni mol-mulk, pul bilan ko`tarishgan chog`i. Ba`zida bosar-tusarimizni bilmay qolamiz. Ko`zimizga hech narsa, hatto nabiralarimiz ham ko`rinmaydi goho. O`ylab qarasangiz, endi bizu sizga mol-dunyoning hech keraklik joyi yo`q. Iymonu insofimizdan ayirmasin, iloyo. Ba`zida biz — kattalar ham mana shunday tarbiyaga muhtojmiz… Oilani saqlab qolish uchun siz harakat qiling. Hozir "burgaga istehzo qilib, ko`rpani kuydirish"dan saqlanish kerak. Yoshlarga bu holatni to`g`ri tushuntirib, oila muqaddasligini ta`kidlab turib, onani ham e`zozlash kerakligini uqtirib tursangiz yutqizmaysiz.
Manba: Darakchi.uz