Главная » Hikoyalar » ​​​Odamlar, asranglar bir-biringizni...
​​​Odamlar, asranglar bir-biringizni...

​​​Odamlar, asranglar bir-biringizni...

  • Категории: Hikoyalar
  • Название: ​​​Odamlar, asranglar bir-biringizni...
  • Дата релиза: 13-06-17, 13:55
​​​Odamlar, asranglar bir-biringizni...
Bu hikoyalar internetdan to`plagan yoki kimlardandir eshitganlarim emas. To`g`ri, hammasining bosh qahramoni menmasman. Ammo ularning barchasiga guvoh bo`lganman. Va voqealardan o`zimcha xulosalar qilganman. Siz ham o`qing. Aminmanki, o`zingiz uchun kerakli xulosani chiqara olasiz...

Orom

«...Ertalab hovliga chiqdim-u hayron qoldim. Kechasi bilan rosa yomg`ir yoqqaniga hayratlandim. Buning nimasi hayratlanarli dersiz. Yomg`irning tovushini eshitmaganim-da! Axir qachondan beri uyqum — qush uyqu. Yo`q, aslida uzoq vaqt ko`zlarimni uyqu mahv eta olmaydi. Shiftga termilib yotaveraman, yotveraman. Bir-ikki odamga dardimni yorgandim, depressiya deyishdi. Dori ichib ko`rdim, giyohli muolajalar qildim, qani naf bersa. Bugun esa qotib uxlabman. Keyin uyga kirdim. To`rt qizdan so`ng tilab olgan o`g`limning xonasini quyosh allaqachon yoritayotgan bo`lsa-da, uning shirin uyqudaligini ko`rib, shukrona aytdim. Ikki yil oldin bolam davlat granti yutib olib, xorijga o`qishga ketgandi. Endi chamalasam, u bilan oromim ham ketgan ekan. Mana, uyimda qo`riqchim, suyanchig`im, dilbandimning omonligi xotirjamlik bag`ishlabdi menga... Bolalarimiz omon bo`lishsin!»

Olov, sut va olma...

«O`shanda hali maktabda o`qirdim. Amakim o`g`lini uylantirdi, u paytlari nikoh oqshomi hovlida bo`lardi. Bazmdan so`ng hammamiz amakimnikida qoldik. Yarim kechasi noxush xabardan uyga chopdik. hovlimizga o`t tushibdi. Borsak, alanga ko`kka ko`tarilgan. Qo`shnilar allaqachon o`t o`chiruvchilarni chaqirgan, lekin ularga ham qanoat qilmasdan paqir bilan uyimizga suv tashishardi. Onam uvvos solib, otam esa unsiz yig`lagan. Ukam ikkimiz engil kiyinganimiz uchun kuz oqshomida sovuqdan tanimiz junjikib turibmiz. Bir payt qo`shnilardan biri uyiga olib kirdi. Issiq sutli choy damlab berdi. Hamon sutli choy ichsam, o`sha mehribon qiyofani eslayman. Ertasi kuniyoq kulga aylangan uyimizga kimdir qo`lida taxta, kimdir tomni yopish uchun yog`och, yana kimdir bir-ikki so`m pul, boshqa mahalladoshimiz olma ko`tarib olib kelgan. Hozir hovlimiz tiklangan. Men uzoqroqqa kelin bo`lganman. Qo`shnilarimning yaxshi kunlarida xizmatida bo`lolmadim, boshlariga tashvish tushganida, ular bizni suyagandek hamdardlik bildirolmadim. Ammo doim duodaman, yaxshiliklari o`zlariga ziyoda bo`lib qaytsin...»

Surat

«Otamning padarini ko`rmaganmiz. Bittagina suratlari, u ham bo`lsa, urushga jo`nayotgani to`g`risidagi guvohnomada bo`lardi. Otam esa uni avaylab sandiqda asrardi. U kishining vafotidan keyin o`sha asralgan tugunchadan bobomizning suratini olib ko`rdik. Ko`zlarida hadik bordek... Eslayman, rahmatli otamiz uzoq yillar dadasini izlagan. Tumanimizdagi urushdan omon qaytgan chol o`limidan oldin bor haqiqatni aytgan.

— Otangni izlama. U halok bo`lgan. Senga bu gaplarni ayta olmasdim... Biz ko`rishdik. Ro`parama-ro`para joylashgan gospitalda edik-da. Ko`rinishi yaxshi edi, bir qo`liga o`q tekkani uchun mato bilan bo`yniga tang`ib olgan, ammo negadir uni og`ir kasallar joylashtirilgan gospitalda yotqizishibdi. Mening oyog`im jarohatlangani sabab yonimga kelib ko`rdi. «Boltaboy, ertaga yurtga qaytayapman», dedi. Ertalab esa kasallar yotgan gospitaldan nom-nishon qolmagandi. Kechasi mina tushib, portlab ketgandi...»

Hayotda biror marta ko`rmagan, o`g`lining kamoli, nevara quchish baxtidan mosuvo bo`lgan bobomning suratiga qarab, rahmatli otam nega suratga tushishni yoqtirmaganini tushundim. Va yana narsani chuqurroq angladim, tinchlikda otayotgan har bir tong uchun doim shukrona aytish kerak... Ko`zlarimiz doim quvonchdan porlasin...»

Tush va o`ng

«U doim tushlarimga kiradi. Hamon uning bizni tark etganiga ishonmasam-da, tushlarimda hayotligidan o`zimda yo`q xursand bo`lib ketaman. Bayram, tug`ilgan kunlarimda olisda bo`lsa-da, qo`ng`iroq qilib tabriklaydigan, «Boya, internetdan yozgandingiz-ku desam ham, «Men jonli ijroda tabriklashni yaxshi ko`raman-da», deydigan, ukamdek aziz bo`lib qolgan qorachagina bolani juda qattiq sog`inaman. Yaqinda, tug`ilgan kunimdan ikki kun o`tgach, yana tushimga kirdi. Ijtimoiy tarmoqdan menga tabrik jo`natayapti. Men esa arazdaman: «Nega qo`ng`iroq qilmadingiz?» deya. U esa iloji yo`qligini aytdi... O`tganlarni Xudo rahmat qilsin...

Uyg`ondim-u ko`p yillar oldin o`rtamizga devor tushgan birodarimga xabar jo`natdim: «Hammasi uchun rahmat!»

Imkonimiz, ilojimiz bor paytda yaqinlarimizni unutib qo`ymaylik, kuttirmaylik... Axir hammasi o`tkinchi...»

Asl do`st

«Bolaligimda sinfdosh dugonam bilan bir kitobni tanlardik-da, bir paytda o`qirdik. Uyga biror yangi asar ko`tarib kelsam, albatta, dadam ham hamroh bo`lardi. Dugonam avvalboshdan chaqqon. Kitobni qo`liga olardi-da, dialoglarini o`qib chiqib, birinchi bo`lib tugatardi. Men esa dadamning kitobni tokchaga qo`yishini kutib o`tirardim. Ishga ketishi bilan chopib borib olardim-da, o`qiy boshlardim. Oxiri dadamga yig`ladim:

— Zuhra sinfdoshim kitobni to`liq o`qimaydi, dialoglariga ko`z yugurtiradi, xolos. Men esa nuqul undan orqada qolib ketaman, — deya.

— Bu uning tanlovi. Sen biror satr qoldirmay o`qishni istaysanmi, o`qi! Boshqalarga qarab, to`n bichma.

Endi anglayapman, hayotda har bir insonning o`z tanlovi bo`larkan. Men o`zimni tanlovda adashmagan deb hisoblayman. Ha, aytgancha, siz ham do`st sifatida kitobni tanlang. Bolalaringizga bolalikdan asl do`stni ko`rsating. Shunda ular hayotda kamroq adashishadi... Xato qilishsa ham, to`g`ri xulosa chiqara olishadi. Muhimi shu emasmi?»

Soch

«Men ularni yaxshi taniyman. Ammo ismini, yashash manzilini, nima ish qilishlarini bilmayman. Deyarli har kuni kechki payt metro vagonida uchrataman. O`ttizdan oshgan erkak va uning chamasi sakkiz yoshlardagi qizi. Aslida mening e`tiborimni qizaloqning uzun sochlari tortgan. Chunki doim sochim uzun bo`lishini istaganman-u, lekin hech o`stira olmayman-da... Ularning qo`llaridagi sumkaning ichida ovqat idishlari borligi yaqqol ko`rinib turadi. Shifoxonadan qaytishayapti, taxmin qilaman. Bir kun ota g`amgin uh tortdi. Qizcha otasining qo`llaridan qo`llarini o`tkazib olgandi, kafti bilan dadasining kaftini siqdi va ko`zlariga qarab jilmaydi. Otasi peshanasidan o`pib qo`ydi. Ko`zlarida yosh miltilladi. Ertasiga yana ko`rdim, qizaloqning ko`zlari yig`idan qizargan. O`rindiqqa o`tirgach, dadasidan so`radi:

— Onamning sochlari o`ssa, tuzalib ketadimi? Men ularga sochlarimni kesib beray, dada...

Metro yaqinida onkologiya shifoxonasi borligi o`shanda xayolimga keldi. Qizaloqning onasi saraton xastaligiga uchragan ekan... Murg`ak yurakchaning niyati ijobat bo`lib, onasi dardiga davo topishini men ham Yaratgandan so`radim. Siz ham duo qiling, barcha onalar, otalar farzandlari baxtiga sog` bo`lishsin...»

Shoira ShAGIAHMEDOVA
Manba: Darakchi.uz

Смс Шерлар
Ustozlarim sizlarga rahmat 2022
Ustozlarim sizlarga rahmat 2022
1 - OKTYABR O'QITUVCHILAR KUNI HAQIDA SHERLAR
Кетаман
Кетаман
SEVGI ROMANTIKA HAQIDA SHERLAR SMS
KO'ZLARIMNI TARJIMA QILING
KO'ZLARIMNI TARJIMA QILING
ONALAR HAQIDA YANGI SHERLAR
Рахмат Онажон
Рахмат Онажон
ONALAR HAQIDA YANGI SHERLAR
YORIM BO'LING
YORIM BO'LING
SEVGI ROMANTIKA HAQIDA SHERLAR SMS
O'jarliging jonga tegdi
O'jarliging jonga tegdi
SEVGI ROMANTIKA HAQIDA SHERLAR SMS
Yomg'irlar
Yomg'irlar
SEVGI ROMANTIKA HAQIDA SHERLAR SMS
Onajonim mehrizga to‘yib
Onajonim mehrizga to‘yib
ONALAR HAQIDA YANGI SHERLAR
Tanishgandik Bekatda
Tanishgandik Bekatda
SEVGI ROMANTIKA HAQIDA SHERLAR SMS
Логин:
Пароль: