QARIYANI TA’QIB ETGAN KELINCHAK
- Категории: Qo'rqinchli Voqealar
- Название: QARIYANI TA’QIB ETGAN KELINCHAK
- Дата релиза: 21-02-16, 21:37
Rizamat otaning ko‘ngli
bir necha
kundan beri g‘ash. Uch
kundan keyin yolg‘iz
farzandi Oltinoyning
to‘yi bo‘lishini o‘ylab,
qizining baxtidan bir
quvonsa, hayhotdek
hovlida yolg‘iz o‘zi
qolayotganidan bir
kuyunardi. Xotinining
vafotidan so‘ng shu
qiziga qattiq bog‘lanib
qoldi. Endi esa bu
mehribonining hayotini
taqdiri azal shahar
bilan bog‘layapti.
«Qayerda bo‘lsa ham,
baxtli
bo‘lsa bas...» Ota faqat
shu so‘zlar bilan o‘zini
yupatardi.
Bir necha kundan beri
mahzun tortib
qolgan Oltinoy
dadasining oldiga choy
ko‘tarib keldi. Padari
buzrukvorining bir
nuqtaga tikilib turganini
ko‘rib, biroz
indamay turdi. So‘ng
choyni qaytarib,
piyolaga quyarkan,
yoqimli tovushda:
— Dada, nimalarni
o‘ylab o‘tiribsiz? —
deb so‘radi.
Qizining savoli Rizamat
otaning
xayollarini bo‘lib yubordi:
— Eh, qizim, nimani
ham o‘ylardim?
Shunchaki... Endi sensiz
kunlarim qanday
o‘tarkin? Seni juda
sog‘insam kerak.
— Dadajon, xavotir
olmang, 5-6 oydan
so‘ng yana qishloqqa
qaytamiz. Shunda har
kun sizdan tez-tez
xabar olib, yoningizda
bo‘laman.
Tasodifan tomchilay
boshlagan yomg‘ir
ota-bolaning suhbatiga
xalal berdi. Ular
birin-ketin uyga kirib
ketishdi.
* * *
To‘y ajoyib o‘tdi.
Hamma xursand.
Faqatgina Rizamat
otaning ko‘ngliga
o‘ralashib qolgan
g‘ashlik aslo tarqamas,
negadir qizini sira qo‘yib
yuborgisi kelmasdi.
Lekin nachora, qiz bola
— palaxmon toshi.
Allohning hukmi shu
ekan, deya qiziga oq
fotiha tilarkan, otaning
qalbidan o‘ylar tizgini
ketma-ket o‘taverdi.
Hayhotday hovlida
cholning yolg‘iz o‘zi
qoldi. Qizini uzatganiga
bir hafta bo‘lmay
turib, qalbini olam-olam
sog‘inch egalladi.
Rizamat ota shu
qishloqdagi maktabda
qorovul. Har kuni ishdan
allamahalda
qaytadi. Bugun har
doimgidek qorong‘i
tushib qolgan. Ammo
shunday bo‘lsa-da,
to‘lin oyning yorqin
nurlari zim-ziyo
ko‘chalarni yoritib
turardi. Nimalarnidir
o‘ylab, xayol surib
kelayotgan otaning
ko‘zi
tasodifan ko‘chaning bir
chekkasida
mung‘ayib o‘tirgan
kelinchakka tushdi. U
taajjublandi. «Yarim
tunda kelinchak nima
qilib yuribdi? Balki
yo‘lidan adashib
qolgandir», deb o‘ylab,
Rizamat ota unga
yaqinroq bordi. Boshini
quyi solib turgan
kelinchak otani ko‘rib,
unga salom berdi.
Kelinchakning yuzlariga
diqqat bilan razm
solgan ota bir seskanib
tushdi. Uning mayus
chehrasi xuddi qiziga
o‘xshardi. «Oltinoy
poytaxtda bo‘lsa,
qanaqasiga bu mening
qizim bo‘lsin? Balki uni
sog‘inganim uchun
shunday
tuyulayotgandir», deb
o‘yladi
Rizamat ota.
— Qizim, qorong‘ida bu
yerda nima
qilyapsiz? Kimnidir
kutyapsizmi?
Kelinchak hech narsa
demas, faqat
jilmaygancha qarab
turardi, xolos.
— Yoki adashib
qoldingizmi? — qayta
so‘radi chol.
Kelinchak hanuz
gapirmas, jim
turaverardi.
— Qizim, boradigan
joyingiz yo‘qmi?
Agar shunday bo‘lsa,
xohlasangiz, biznikiga
yuring.
Yana hech qanday javob
bo‘lmagach,
Rizamat otaning xunobi
oshdi:
— Menga gapirgingiz
kelmayotgan
bo‘lsa, mayli, men
ketaman. Lekin, qizim,
qorong‘ida yolg‘iz
yurmang, bu yaxshi
emas.
Rizamat ota yo‘lida
davom etdi. Biroz
yurgandan so‘ng ortiga
o‘girildi. Qarasa,
kelinchak ham ortidan
kelyapti. Ota hech
narsa demay ketaverdi.
Kelinchak ham unga
ergashib borardi. Uyiga
yetib kelishiga 7-8
qadam qolganda, chol
yana ortiga o‘girildi.
Kelinchak hamon unga
jilmayib turardi.
Biroq, ko‘zlarida
qandaydir g‘amginlik bor
edi. Kelinchakdagi aynan
shu g‘amginlik uni
qizidan farqlab turardi,
otaning nazdida.
Chunki Oltinoyning
ko‘zlari doim chaqnab
turar, o‘zgacha surur
bor edi.
— Qizim, hech
tortinmang, bu mening
uyim, — deb, Rizamat
ota devorlari nurab
qolgan pastakkina
darvozali uyga ishora
qildi. Keyin esa
darvozani ochib,
kelinchakni
ichkariga taklif qilish
niyatida ortiga o‘girildi.
Shunda u hayratdan
yoqa ushlab qoldi.
Kelinchak bir zumda
g‘oyib bo‘lgandi. Ota
«Tavba», dedi-yu, uyiga
kirib ketdi.
Ertasi kuni ham u ishdan
qaytayotib,
o‘sha joyda yana o‘sha
kelinchakni uchratdi.
Bu holdan ajablangan
chol uning yoniga
yaqin borib, so‘radi:
— Kecha nega ketib
qoldingiz, qizim,
tinchlikmi? Yoki sizni
xafa qilib qo‘ydimmi?
Yana o‘sha holat.
Kelinchakning javob
bergisi kelmasdi. Buni
payqagan chol tag‘in
yo‘lga tushdi. Xuddi
kechagidek, bugun ham
kelinchak cholga hamroh
bo‘ldi.
«Bu kim bo‘ldiykin? Kel,
uni yana bir
gapga solib ko‘ray-chi?»
degan o‘yda
Rizamat ota haligi
kelinchak bilan
suhbatlashmoqchi bo‘ldi:
— Xuddi sizga
o‘xshaydigan
chiroylikkina qizim bor.
Turmush qurgandan
so‘ng shaharga ko‘chib
ketdi. Uni juda
sog‘inaman. Negadir
sizni ko‘rganimda,
qizim yodimga tushdi...
Kelinchakning yuzida
kechagi
tabassum ifodasi
ko‘rinmasdi. Uning
yuziga
tubsiz qayg‘u soya
solgandi. Ular uyga yetib
kelishdi. Rizamat ota
darvozani ochishdan
oldin kelinchakka
yuzlandi:
— Kecha indamasdan
ketib qoldingiz,
bugun unday qilmang,
xo‘pmi? Keling,
yaxshisi, biznikida
yashay qoling, qizim.
Meni
o‘z otangizdek qabul
qiling.
Kelinchakning g‘amgin
yuzlarini
qarog‘ida miltirayotgan
ko‘z yosh tomchilari
yuva boshladi.
— Nega yig‘layapsiz,
qizim? Nima
bo‘lgandayam
kuyunmang, oyning o‘n
beshi
yorug‘ bo‘ladi. Xudo
xohlasa, hammasi iziga
tushib ketadi, — deya
ota kelinchakka dalda
bergandek bo‘ldi.
Chol darvozani ochib, ne
ko‘z bilan
qarasinki, kelinchak
yana g‘oyib bo‘lgandi.
Bu g‘ayritabiiy holatdan
qo‘rquvga tushgan
ota uyiga kirar-kirmas
darrov kalima qaytara
boshladi.
Bu holat bir necha kun
davom etaverdi.
Har kuni ishdan
qaytayotganda Rizamat
ota
kelinchakka ro‘baro‘
bo‘lar, odatdagidek, qizi
haqida to‘lib-toshib
gapirar, uyiga yetib
borganida esa kelinchak
o‘z-o‘zidan g‘oyib
bo‘lib qolardi. Bu holat
ikki hafta davom etdi.
Bugun negadir erta
tongdan Rizamat
otaning yuragiga
g‘ulg‘ula tushdi. Ota endi
ishga ketishga
chog‘lanib turganida,
kuyovi
kirib keldi. Rizamat ota
kuyovini bir ahvolda,
horg‘in, xafa holda
ko‘rib, qo‘rqib ketdi.
— Assalomu alaykum,
dada. Ahvolingiz
tuzukmi?
— Vaalaykum assalom,
o‘g‘lim. Qani,
ichkariga kiring.
Tinchlikmi, Oltinoy qani?
Qachon shahardan
qaytdinglar? — deya
ota
kuyovini savollarga
ko‘mib tashladi.
Kuyovi hech nima
demadi. Bo‘g‘ziga
achchiq bir narsa tiqilib
qolgandi.
— Nega Oltinoyni
o‘zingiz bilan birga
olib kelmadingiz? YO
biror gap bo‘ldimi?
— Ota, meni kechiring,
qizingizni asray
olmaganim uchun
kechiring!.. — yigitning
ko‘zlaridan yosh
dumaladi. — Hammasi
to‘satdan bo‘ldi. Yo‘lda
ketayotgandik,
Oltinoyni mashina urib
ketdi. Bu baxtsiz
voqea edi, eng dahshatli
fojia... Darrov
kasalxonaga olib bordik.
Ikki hafta
davomida komada
hushsiz yotdi. Do‘xtirlar
hech qanday umid yo‘q,
deyishdi. Biroq biz
hammamiz uni, albatta,
hushiga kelib,
oyoqqa turib ketishiga
ishonardik. Shuning
uchun bu haqda sizga
xabar qilib, xavotirga
qo‘yishni
xohlamagandik. Biroq
Alloh unga
shunday qisqa umr
bergan ekan,
qo‘limizdan hech narsa
kelmadi..
Bu gaplarni eshitib,
Rizamat otaning
oyoqlarida mador
qolmadi. Qo‘llari qaltiray
boshladi. Tili kalimaga
kelmas, faqat
ko‘zlaridan achchiq yosh
tomchilardi, xolos.
Yolg‘iz qizidan ham
ajralgan otaga
hayotning qizig‘i
qolmadi. Bir oy oldin
qizini
kelinlik libosida o‘zga
uyga kuzatgandi. Endi
esa... Uning uchun
bundan-da dahshatliroq
fojia yo‘q edi. Og‘ir
ayriliqdan keyin ota
kasal
bo‘lib yotib qoldi.
Vaqt hamma narsaga
davo bo‘ladi,
deganlari rost ekan.
Rizamat ota tuzalib,
yana ishga qatnay
boshladi. Lekin uning
ko‘zlarida hayotga
bG‘lganumid butkul
so‘ngan, faqat kun
o‘tkazish uchungina
ishga borardi. U ishdan
avvalgidek
qorong‘ida qaytardi.
Rizamat ota o‘sha
kelinchakka duch
kelishni juda istadi. Kuchi
qolmagan bo‘lsa-da,
dadil qadamlar bilan
kelinchakni uchratgan
o‘sha manzilga
shoshildi. Biroq u yerga
yetib borganida,
hech kim ko‘rinmasdi.
Chol yon-atrofga
qarab, uni qidira
boshladi.
Endi u har doim ishdan
qaytishda
kelinchakni uchratishni
va unga hamroh
bo‘lib kelishini umid qila
boshladi. Biroq
bunday bo‘lmadi.
Rizamat ota qorong‘ida
uyiga qaytar ekan,
o‘zicha voqealarni tahlil
qildi. «Ikki hafta
davomida menga
hamroh
bo‘lgan kelinchak--
komada hushsiz yotgan
qizimning ruhi... O‘zi
va’da qilganidek,
holimdan xabar olgani
kelibdi-da».
Rizamat ota kelinchakni
qayta
uchratmadi. Har doim
qizini yonida
yurgandek tasavvur
qilar va xayolan u bilan
suhbatlashib yurardi.
Qishloqdagilar esa uni
o‘ziga-o‘zi gapirib
yuradigan jinniga
chiqarishdi. Otadan hol-
ahvol so‘raydigan
biror kimsa topilmadi.
Faqat ba’zi-ba’zida
kuyovi kelib turar va
ular ikkisi Oltinoy
haqida uzoq-uzoq
suhbatlashishardi.
Смс Шерлар