Smartfonga ulanadigan “aqlli” velosiped ixtiro qilindi

Kickstarter’dagi Vanhawks Valour loyihasi mualliflari qaytadan velosiped ixtiro qilishdi. Yangi qurilma — yuqori texnologiyali velosiped transport vositasi sifatida yaratildi. Bu haqda Look At Me xabar berdi.Velosiped ruliga ikkita LED-lampalar o‘rnatilgan, ular burilish kerak bo‘lgan joyda yonib-o‘chadi. Yo‘l haqidagi ma’lumotlarni aqlli velosiped Bluetooth orqali smartfondan oladi.

Dastaklarda vibromotorlar joylashgan. Orqa g‘ildirak sensorlari boshqa transport vositasi yaqinlashayotganini sezsa, ular ishga tushadi. Ushbu texnologiya yordamida velosipedda naushnik orqali musiqa eshitish xavfsizroq bo‘ladi.

Safarlar haqidagi barcha ma’lumotlarni velosiped iOS va Android’dagi tegishli dasturga yuklaydi. Bundan tashqari, velosiped o‘g‘irlab ketilgan taqdirda, uni o‘sha dastur orqali topish mumkin bo‘ladi.

Loyiha zarur miqdordagi summani yig‘ishga muvaffaq bo‘ldi. Ilk velosipedlar oktabrda sotuvga chiqadi. Ularning narxi 1049 dollarni tashkil etadi.