Bugun hasta bo'ldingmi ona

Har kun yo'qlab qo'ng'iroq qilib
Axvolim ne bir so'roq qilib
Yo'qlardinga yurakni tilib
Bugun hasta bo'ldingmi ona?
Bo'laymi boshingda parvona?

Farzandlaring yaxshimi derding
Hamma kechdi sen yo'qlab kelding
Yoshlik chog'ing shamolday yelding
Bugun hasta bo'ldingmi ona?
Bo'laymi boshingda parvona?

Kamim bo'lsa ro'zg'orim butlab
Olib kelding boring qo'sh-qo'llab
Bizlar sog'lom sen quvvat talab
Bugun hasta bo'ldingmi ona?
Bo'laymi boshingda parvona?

Og'ir botmas sira so'zlarim
O'xshab ketar senga ko'zlarim
Bir so'z degin bo'ldi bo'larim
Bugun hasta bo'ldingmi ona?
Bo'laymi boshingda parvona?

Bor mehringni bizga bergan sen
Sinovlarda hamrox yurgan sen.
Umring uchun nima qildim men
Bugun hasta bo'ldingmi ona?
Bo'laymi boshingda parvona?

O'zing o'ylab bog'lar kezmading
Boshqalardek tog'lar kezmading
Davralarda kulib yurmading
Bugun hasta bo'ldingmi ona?
Bo'laymi boshingda parvona?

Qora soching qolmabdi qara
Bir so'z degin ovunay zora
Qalbing ochgin menga bir bora
Bugun hasta bo'ldingmi ona?
Bo'laymi boshingda parvona?

Muallif:Mirxalilova Shaxnoza