Ona mendek bag'ritoshni kechiring

O'zim bilan o'zim bo'lib ovvora
Bir oy bo'ldi yo'qlamadim bir bora.
Farzand deya bir yuragi ming pora,
Ona mendek bag'ritoshni kechiring.

Qo'ng'iroq ham malol kelib qoldimi
Yo bilmayman sabr kosam to'ldimi.
Komil farzand ayting shunday bo'ldimi?
Ona mendek bag'ritoshni kechiring.

Sochingizda oqlar asli bizlarmiz
O'zin o'ylab yurgan o'g'il-qizlarmiz.
Ortingizda qolib ketar izlarmiz
Ona bizdek bag'ritoshni kechiring.

Hayot yo'lim yoritguvchi nur,chiroq
Bugun albat qilay sizga qo'ng'iroq.
Ollohdan so'ng yo'qdir sizdan buyukroq
Ona mendek bag'ritoshni kechiring.

Muallif:Mirxalilova Shaxnoza