Hanuz xayolingda borligim qiziq (Xato)

Ehtimol atarsan o‘tmishni qaro,
Biz yurgan yo‘llarga tortarsan chiziq.
Ming bitta harakat, urinish aro,
Hanuz xayolingda borligim qiziq.

Ehtimol suratim yirtishing mumkin,
Yozishing ham mumkin:- "Hammasi ertak".
Ammo yuragingdan ketishim uchun,
Ko‘ksingdan sug‘urib otishing kerak.

Tanishdir bu holat menga barchasi,
Senga" alvido" deb ketgandan buyon.
O‘shanda, singandi ko‘nglim darchasi,
To hanuz ruhimda ko‘pchiydi tug‘yon.

Bilmoq istasang shu: - sog‘inchim dengiz,
Gʻururim o‘zimga dars, jazo bo‘ldi.
Sevsak-da, indamay ayrilishimiz,
Ikkimiz uchun ham ko‘p xato bo‘ldi.

Endi yashagaymiz ichimizda cho‘g‘,
Ayrilmoq bor ammo, unutmoqlik yo‘q.

Dilobar Uralova