Telbalarcha sog'ingan

Ўша менман - хайр деб
Телбаларча соғинган,
Ёнган бу юрагини
Музлар босиб овунган,
Йўлларидан чиқсанг, гар
Қараб кетган тескари,
Ўша менман – хайр деб
Телбаларча соғинган.

Нигоҳинг ўткир ўткир,
Дош бериб туролмаган,
Қанча тикилса ҳамки,
Дардингни билолмаган,
Мен сен учун кимман деб
Бир бора сўролмаган,
Ўша менман – хайр деб
Телбаларча соғинган.

Жумбоқдир – рад этилган,
Ёки қаттиқ севилган,
Юрагингда қолганми,
Ёки ундан қувилган,
Бир томчи кўз ёшинга
Оқиб кетиб ювилган,
Ўша менман – хайр деб
Телбаларча соғинган.

Ўзи менга ёр топиб,
Ўзи мени кузатган,
Туйхонамни турфа хил
Гуллар билан безатган,
Кетсам ортимдан йиғлаб,
Қўлларини узатган,
Ўша сенсан – хайр деб
Телбаларча соғинган.

ДИЛДОРА АБДИНАЗАРОВА