Yor yor aytib beraman yor to'yingizda

Yor yor aytib beraman yor to‘yingizda,
Raqsga tushib, devonadek ko‘yingizda.
Taqdir menga ostonasin ep ko‘rmagan,
Baxtli bo‘lsin o‘zga dildor uyingizda.

Yor yor aytib kuyga solay xonishimni,
Doiraning zarbi yopsin nolishimni.
Kim bilibdi armon bo‘lib yor demoqlik,
To‘yingizda o‘lan kuylab qolishimni.

Uyingizga eltar yo‘llar buncha toshli,
Suyganingiz suluv ekan, qalam qoshli.
Yor yor aytib yig‘labdi deb o‘ylamang yor,
To‘y gulxani tutunidan ko‘zim yoshli...

SHAHNOZA RO‘ZIYeVA