O'zbekistonim haqida sher 2021

Xushbo'y ifor sochar chaman-gulzoring,
Madhingni kuylagay jilg'a, anxoring,
Ko'zlarim quvnatar moviy osmoning,
Ta'rifing aytmoqqa ojiz zabonim,
Tangrim nazar qilgan O'zbekistonim!

To'rt fasling bahormi, sequyosh o'lkam?
Shaffof havolaring to'ldirar o'pkam,
Siyrating o'ktamdir, savlating ko'rkam,
Tabiat siylagan jannatmakonim,
Tangrim nazar qilgan O'zbekistonim!

Beshigim tebratgan Onamsan o'zing,
Boshimda parvona Otamsan o'zing,
Bunchalar sahiysan, xotamsan o'zing,
Ravnaqing yo'lida berayin borim,
Tangrim nazar qilgan O'zbekistonim!

Buyuk ajdodlardan merosimdirsan,
Ko'nglim ardog'ida, e'zozimdirsan,
Yuksakka chorlagan parvozimdirsan,
Dovrug'i bu olam aro dostonim,
Tangrim nazar qilgan O'zbekistonim!

Mehmondo'st el bormi, asli bu eldek?
So'zga no'noqrog'i she'r yozar mendek,
O'ziga bek asli, azaldan o'zbek,
Millatim g'ururim, millatim shonim,
Tangrim nazar qilgan O'zbekistonim!

Abdumutalib Ergashaliyev