​Боласини ахлат қутига ташлаган аёл қўлга олинди

Россиянинг Химки шаҳрида уйда бола туғиб, чақалоқни ахлат контейнерига ташлаган аёл қўлга олинди, деб хабар берди Ntv.ru нашри.

Бу ҳақда Россия ИИВнинг Подмосковье бошқармаси матбуот хизмати бошлиғи Татьяна Петрова маълумот берди:

“Тверь вилоятида яшовчи 30 ёшли аёл уйида ўғил фарзандни дунёга келтирган. Кейин чақалоқни Библиотечний кўчасидаги ахлат контейнерига ташлаган”.

Петрованинг хабар беришича, чақалоқни ахлат контейнерига ташлаган аёлнинг уч нафар вояга етмаган фарзандлари бор. У иқтисодий танг аҳволда қолгани туфайли боладан қутулишга қарор қилган.

Маҳаллий аҳолидан бири дўконга кетаётганда ахлат контейнерининг ичидан чиқаётган чақалоқ йиғисини эшитиб қолган. Чақалоқни топиб олган эркак уни зудлик билан яқин ўртада жойлашган полиция бўлимига олиб борган. Айни пайтда боланинг ҳаёти хавф остида эмас.

Полиция ходимлари бағритош онани қўлга олди ва боланинг ҳаётини хавф остига қўйиш айблови билан унга нисбатан жиноий иш қўзғатди. Айни пайтда қамоқда сақланаётган аёлга бир йил озодликдан маҳрум этиш жазоси тайинланиши мумкин.
Manba: Darakchi.uz