«МТС» Ўзбекистон бозорида Universal Mobile Systems номи билан иш бошлайди

Россиянинг «МТС» ва Ўзбекистон ҳукумати ўртасида ташкил этиладиган янги алоқа оператори Universal Mobile Systems номи билан фаолият олиб боради.

Ўзбекистон Вазирлар Маҳкамаси «Мобиль алоқа хизматларини кўрсатиш бўйича Universal Mobile Systems қўшма корхонасини тузиш тўғрисидаги қарорни қабул қилган. Қарорда белгиланишича, UMS 1 ноябрга қадар техник, 1 декабрга қадар тижорий эксплуатацияни амалга оширади.

UMS (Universal Mobile Systems) — Ўзбекистон ва «МТС» ўртасида тузиладиган қўшма корхонанинг номи бўлиб, уни тузиш ишлари 15 августгача, қўшма корхонани рўйхатга олиш ишлари эса 25 сентябрга қадар тугалланиши кутилмоқда. Янги қўшма корхона қандай бренд остида иш олиб бориши ҳозирча номаълум.

Аввалроқ, «МТС» компанияси Ўзбекистон ҳукумати билан муроса битими имзолагани, Ўзбекистонда янги қўшма корхона ташкил этиши, корхонанинг 50,01 фоизи «МТС»га, 49,99 фоизи эса Ўзбекистон ҳукуматига тегишли бўлиши ҳақида хабар берган эди.

Эслатиб ўтамиз, «МТС»нинг Ўзбекистондаги аввалги шўъбаси – «Ўздунробита» компанияси амалда 2012 йил июлида фаолият кўрсатишни тўхтатганди. Ўшанда алоқа соҳасидаги назорат қилувчи орган (Ўзбекистон Алоқа ва ахборотлаштириш агентлиги) томонидан компаниянинг лицензиялари чақириб олинган, кейинчалик Ўзбекистоннинг турли органлари томонидан умумий қиймати 600 миллион долларга тенг бўлган даъволар эълон қилинганди.

Қайд этиш жоиз, «Ўздунробита» фаолиятини тўхтатганидан сўнг, Ўзбекистон GSM-алоқа бозорида фақат иккита – «Билайн-Ўзбекистон» ва Ucell алоқа операторлари қолди, айни вақтда, ўтган икки йил давомида алоқа сифати нисбатан ёмонлашди.

Изоҳ: Хабар 4 август, 18:50да таҳрирланди ва тўлдирилди.