Озодбек Назарбеков 2017 йилда концерт бермаслиги сабабларига ойдинлик киритилди

Ўзбекистон халқ артисти Озодбек Назарбеков 2017 йилги мавсумда концерт бермасликка қарор қилди. Мазкур қарорга Озодбек Назарбековнинг матбуот котиби ойдинлик киритди, деб ёзади Daryo.uz нашри. «Назарбеков сўнгги йилларда тақдим этган концертларининг барчасида юз фоиз жонли ижрода куйлади, кучли босим билан меҳнат қилди. Бу эса ўз таъсирини кўрсатди, унда ҳам руҳий, ҳам жисмоний томондан толиқишлар бўлди». Қайд этиш керак, Озодбек Назарбеков «Ўзбекнаво» эстрада бирлашмаси томонидан ташкил этилган «Мавсум хитлари» концерт дастурида қатнаша олмади, икки кундан сўнг эса Туркманистондаги концертда қатнашди. «‘Мавсум хитлари’ тақдирлаш маросимида истмаси кўтарилиб кетгани учун иштирок эта олмади. Бироқ Туркманистондаги концертга бориши олдиндан белгилаб қўйилгани учун, бетоб бўлишига қарамай уни ўтказиб қайтди», — деб вазиятга тушунтириш берган қўшиқчининг матбуот котиби. Дилбаҳор Худойбердиеванинг таъкидлашича, Озодбек Назарбеков концерт беришдан танаффус қилган бўлса-да, ижод қилишдан тўхтамаган.