Shavkat Mirziyoev Samarqandda qatnaydigan tramvayning ilk yo`lovchisi bo`ldi

O`zbekiston Respublikasi Prezidenti Shavkat Mirziyoev 2016 yil 5 oktyabr kuni Samarqand viloyatiga tashrifi chog`ida Samarqand shahrida transport tizimini yanada yaxshilash masalasiga alohida e`tibor qaratgan va aholiga qulaylik yaratish hamda shahar atrof-muhiti musaffoligini ta`minlash borasida zamonaviy tramvay liniyalarini barpo etish zarurligini ta`kidlagan edi.

O`tgan qisqa vaqtda tegishli tashkilotlar tomonidan zarur chora-tadbirlar amalga oshirildi. Shahar ko`chalarida po`lat izlar yotqizildi.

Prezidentimiz Shavkat Mirziyoev 15 aprel kuni Samarqand shahrida Temiryo`l vokzali – Sartepa yo`nalishi bo`yicha tramvay qatnovi yo`lga qo`yilishiga bag`ishlangan tadbirda ishtirok etdi, deya xabar beradi O`zA.

Davlatimiz rahbari "Tarix muzeyi" bekatidan "Temir yo`l vokzali" bekatigacha viloyat faollari bilan birga tramvayda keldi. Samimiy muloqot chog`ida mamlakatimiz hududlarida amalga oshirilayotgan islohotlar, aholi farovonligini yanada oshirishga qaratilayotgan e`tibor haqida so`z bordi.

Ikki tomonlama qatnovga mo`ljallangan yo`lda elektr bilan ta`minlovchi to`rtta podstansiya va bitta depo qurildi. Temir yo`l vokzali bilan Sartepa oralig`idagi 6,4 kilometrlik yo`nalishda 8 tramvay harakatlanadi.

Prezidentimiz tramvaylarni boshqarish uchun malakali haydovchilar tayyorlashni yo`lga qo`yish kerakligini alohida ta`kidladi.

Samarqand shahrida to`rtta yo`nalish bo`yicha 20 tramvay qatnovi yo`lga qo`yilishi belgilangan. Mazkur yo`nalishdan tashqari kelgusida Temir yo`l vokzali – Siyob dehqon bozori, Temir yo`l vokzalidan Spitamen ko`chasi orqali Kimyo zavodigacha, Temir yo`l vokzalidan Narpay ko`chasi orqali Kimyogarlar qo`rg`onigacha tramvay liniyalari ochiladi.
Manba: Darakchi.uz