Toshkentda Navro'z bayrami arafasida yana bir madaniyat maskani foydalanishga topshiriladi

Тошкент шаҳрининг Мирзо Улуғбек туманида янги маданият ва истироҳат боғи барпо этиладиган бўлди, деб хабар беради Тошкент шаҳар ҳокимлиги Ахборот хизмати. Тошкент шаҳар ҳокимининг тегишли қарорига мувофиқ, туманнинг Ўзбекистон овози кўчаси йўналишининг охирги қисмида жойлашган, собиқ Тошкент ҳайвонот боғи ҳудудида 12 гектар майдонда янги маданият ва истироҳат боғини бунёд этиш ишлари бошланди. Ҳудудда барпо этилаётган дам олиш маскани мавзедаги аҳолининг севимли истироҳат манзилига айланиши мўлжалланмоқда. Инвесторлар боғ ҳудудини бутунлай янгича лойиҳага асосан олиб бориладиган бунёдкорлик ишларига тайёрлашмоқда. Боғда турли аттракционлар, савдо ва овқатланиш шоҳобчалари, сайр қилиш учун йўлаклар, суҳбатлашиш учун ўриндиқлар ўрнатиш кўзда тутилмоқда. Лойиҳа муаллифлари ҳудуддаги яшил зоналар ҳамда ўсимлик дунёсига зарар етказмасликни эътиборга олишган. Маданият ва истироҳат боғининг Наврўз байрами арафасида фойдаланишга топширилиши режалаштирилган.